بدي وجه رسالة صغيرة لدولة الرئيس و لسماحة السيد بصفتهم مستلمين شؤون وهموم هيدي الطايفة و هيدي البيئة وهيدا المذهب....
دولة الرئيس و سماحة السيد، رح بلش رسالتي الكم هيك دغري بلا ايا مقدمات و بلا ايا مواضيع انشائية و بلا ايا تجميل للواقع،، نحنا كجمهور شيعي المفروض انو نكون امانة برقبتكم، نحنا كجمهور شيعي ولا مرة بحياتنا قصّرنا معكم، نحنا كجمهور شيعي ولا مرة بحياتكم طلبتونا و خذلناكم او امتنعنا عن عن تلبية ندائكم، نحنا كجمهور شيعي حطيناكم على روسنا من فوق و حاربنا فيكم كل الدنيا و كل الكون، نحنا كتنظيمين شيعيّين قدّمنا دم كرمال هيدا البلد و كرمال كرامة هيدا البلد اكتر من ايا تنظيمين تانيين بالكرة الارضية كلها سوا، نحنا تقريبا نص شبابنا عاشوا ايتام البَي كرمال بياتهم قدّموا دمهم على مذابح هيدا الوطن، نحنا اكتر شعب اتشحر و اتعتر و اتهدمت بيوتوا و مصالحوا و ارزاقو كرمال وقف بوج اسرائيل و بوج عملا اسرائيل و بوج مشروع اسرائيل،،، بالمقابل شو طلعلنا؟ شو هوي الشي يلي جنيناه؟ وين هيي الكرامة يلي عم نعيشها؟ وين هوي العز يلي انوعدنا فيه؟ كل هالتضحيات راحت كرمال شو؟ كل هالدم انبذل كرمال مين؟ كل هالشهدا راحوا كرمال ايا وطن؟ كرمال وطن بتجي الكهربا فيه ساعة وحدة بالنهار؟ كرمال وطن اكترية مصالح مواطنينو عم تتسكر؟
كرمال وطن قرطلنا مصرياتنا و جنى عمرنا و مستقبل ولادنا؟ كرمال وطن ما فهش بنزين وما فهش مازوت وما هش فيول و ما فهش شمع وما فهش طرقات وما فهش مدارس و ما فهش اشتراك و ما فهش شي منوب؟ كرمال وطن عم ينزعبوا ولادو من اشغالهم زعبة الكلاب؟ كرمال وطن صاروا نص ابناؤوا عايشين تحت خط الفقر؟ كرمال وطن في بيّات عم تبكي كل الليل عمخدتها كرمالها مش قادرة تأمّن لقمة الخبز لولادها؟ وين هيي الكرامة يلي بتحكونا فيها يا دولة الرئيس و يا سماحة السيد؟ اذا كان النصر على اسرائيل هوي كل الكرامة بنظركم فاسحولي قلكم انكم كتير غلطانين مش شوي، بلا ما فوت بتفاصيل الكرامة بس اقلا شي ليكون عندك كرامة انك تكون عايش متل البشر مش متل الكلاب، نحنا عايشين عيشة الكلاب يا دولة الرئيس ويا سماحة السيد
أيمن عاصي