"نحن كما الماء منجرفكن".
جبران باسيل يصرخ في الحدث مشبّهًا نفسو بالمياه الجارفة...
بس ما عرف انو المياه الجارفة بالعادة بتكون مليئة بالترسبات والوسخ والمواد النتنة والصّدي والنيترات والسموم... والمياه الجارفة بتجرف الزرع الصالح وبتحرم الارض الغطاء النباتي..
تمامًا متل ما عم تعملو بالغطاء الانساني ببلدكن... انتو مياه جارفة صحيح، لانو وزراءكن ما عندن خطط لحماية البيئة وبيطلبو من الشعب يسكرو بوازن،
انتو مياه جارفة متل ما عم تعملو بمرج بسري وسفوح الجبال بالكسارات، انتو مياه جارفة عالقمح وربطة خبز بالدكاكين ما في...
انتو مياه جارفة وجرفتو ٦٠ مليار دولار من جيبة الشعب من ال٢٠٠٥ لهلا.... وانتو المياه الجارفة للي علقت مع السوري واستشهد ثلة من الشباب اللبناني بسببا وضاعوا بترابا، وانأسروا بسجونا
ورجعتو زحفًا زحفًا انجرفتو لعند الأسد ناسفين كل مبادى الشهدا والمفقودين على الاراضي السورية
وما كلفتو خاطركن تسألوا وينن، لك ما استحيتوا حتى من أهاليهن وحرقة قلوب اماتن...
بأكدلك ايه انتو مياه جارفة اكيد، جارفة للمبادئ للوطن للحق للعدالة والدليل انو ما بقى في شي بالحيلة عنا تجرفو...
اصلًا شو بدك تجرف بعد لتجرف، لك ما انجرفت نعمتنا وانجرف اقتصادنا، وانجرف خبزنا ونفطنا واحتياطنا وليرتنا يا معاليك...
يبدو انو الماي المعوكرة رح تكمل علينا بس بأكدلك انو الطاولة للي وعدت الرئيس انك بدك تقلبا هيي طاولة مهرهرة واذا انت ما قلبتا الشعب رح يقلبا