الافكار المسبقة اللي منحطها تجاه الأشخاص، الافكار السلبية اللي منفكر فيها ، السيناريوهات اللي منتخليها عم بتصير بتكون مشاعر سلبية وأفكار غير منطفية ولا عقلانية وبتخلينا نعمل أحكام مسبقة عن اللي حوالينا.. والأسوء انو بتخلينا نحس بمشاعر حقيقية عمبتأذينا و عمبتخلينا نكون مواقف تجاه هالأشخاص.. مع ضخ كل هالأفكار وهالمشاعر.. الشخص التاني مابكون عارف شي من اللي انت عمبتفكر او عمبتحس في... يمكن هالأشخاص ما بيستاهلو نحس ونفكر هيك.. وجودن بحياتنا أهم من كل شي عمبدور براسنا..
كرمال هيك قبل ما ناخد أي موقف.. نطلق اي حكم.. خلينا نجرب نقعد ونحكي معو ونقلو القصة اللي صارت بكل تجرد.. بس الاهم نعرف كيف نستعمل كلماتنا.. ما بحياتنا لما نحكي عن مشاعر و افكار بتخصنا نستعمل صيغة " الأنت"، خلينا نركز على "أنا" "انا شو حسيت" "أنا شو سمعت" "أنا شو فهمت"
لأنو نحن معودين انو مباشرة نحط الحق على غيرنا بس نحس بشي ما حلو و مننسى انو هي نحنا اللي حسينا و نحنا اللي فكرنا و ما فينا نحمل الآخر عواقب أحاسيسنا وتوقعاتنا منو..
وصف Gary chapman بكتابه "Love as a Way of Life" بتعبير مجازي انو الكلمات اللي بتطلع منا يا بتكون متل لرصاصة او البذرة بمعنى تاني لما نستخدم كلماتنا كرصاصة مع شعور بالتفوق والإدانة ، لما منكون قادرين نصلح علاقاتنا بينما إذا استخدمنا كلماتنا كبذور مع شعور بالدعم وحسن النية ، ففينا نعيد بناء علاقاتنا بطريقة ايجابية وفعالة.
مش هين نحكي عن مشاعرنا السلبية وعن أحداث زعجتنا مع شخص آخر ، بس خلينا نركز على الهدف من الحديث، خلينا نصغي بصبر ونتحدث بلباقة ونقول الحقيقة متل ما نحنا منفهمها. خلينا ننتبه على كلماتنا، الصوت والنبرة ونظرة العين ولغة الجسد وتصرفاتنا مع إدراكنا الداخلي على كل المشاعر اللي عمنحسها.
القصة كلا انو أي علاقة حتكون بلا معنى اذا ما منقدر نعبر عن مشاعرنا وأفكارنا بشكل صادق وصريح..