#مزح_وجد : حلقة "2" : النفايات ستعود قريبا الى الشوارع
عنا بلبنان ديماً بتصير مشكلة
بتنسينا مشكلة قبلها وبتلهينا عنا
مين منا ما انشغل من شهر بمشكلة الحدث
وانقسموا الناس على لفظها لمجموعتين بل اكتر
ناس بيلفظوها حدت و ناس حدث
و فينا نقول آخر الكفاءات
بتظبط؟ مبلا بتظبط
هلق مش رح نختلف على لفظ الكلمة
لأنو في شي أهم بكتير ورا هيدي الكلمة
بلشت القصة من عند الناشط محمد عواد
يلي كان عم يدوّر على شقة للإيجار متل كل هالشباب
يلي مش قادرة تستملك بيت بسبب الأوضاع الإقتصادية الصعبة
محمد توجه على منطقة الحدث (اللبنانية)
و إذ بيتفاجئ بسؤال صاحبة البيت إذا هو مسلم أو مسيحي
لحتى تشوف إذا فيها تأجرو
و طبعاً كان الجواب الرفض بذريعة إنو مسلم
و بعدها المشكلة لليوم عم تتفاعل ،
شفنا المواطن محمد عمار يلي ترك بيتو
لان رئيس البلدية منعوا من تسجيله
غير ال ٧ عائلات يلي انذرتهم البلدية
لمغادرة منازلهم بنفس النهار
كل هيدي الاعمال مستندة على قرار رئيس البلدية
يلي اصدره من ٩ سنين وبيمنع تأجير أو إستملاك
اي مسلم بهيدي المنطقة
خوفاً على التغيير الديمغرافي
شو يعني تقييد حق التملك لطوائف أخرى
بحجة الخوف على الوجود؟
آه لحظة.. ليه ما في سكان بالحدث مسلمين ؟
أو لتكون مقسومة قسمين
الحدث العليا و الحدث السفلى
الحدث العليا القريبة من بعبدا و الحظر فيها مفروض
أما الحدث السفلى و هي الملاصقة للضاحية الجنوبية
و عملية الشراء أو الإيجار فيها مسموحة
عفواً؟ بس وين العيش المشترك و التعايش
يلي ديماً منسمع عنن؟
أو هي بس نقاط كسلم لتحقيق غايات خاصة؟
هلق يمكن اهل الحدث ماعم يتخايلوا قهوة شببلكية
فاتحة بنص الحدث ( العليا)
و الشباب مزينة الأرصفة و عم بتعطر الأجواء
بأراجيل متعددة النكهات
و حمودي شاب الدليفري رايح جاي عال (جوغ)
مع الزمور الحنون بالمنطقة
أو أبو علي يلي كل يوم بيوفر ينزل ٥ طوابق
لأن ما في كهربا
و بيصرخ للدكنجي (آوووو) تيناولوا ربطة خبز
عم تتخايلوا ؟؟
Oh mon dieu
و بما انو البرنامج بين المزح و الجد هلق صار دور الجد
كل هالأسباب مش مقنعة و هيدا القرار هو ضمني و مش رسمي
و نابع من توافقات سياسية لا غير
و اد ما أُستفزيت من هيدي القرارات الوهمية
رحت و تواصلت مع صديق محامي ت نشوف
انا و انتو القانون فعلياً شو بيقول
فبحسب قانون العقوبات مادة ٣١٧
"كل عمل و كل كتابة و كل خطاب يُقصد منها أو يَنتج عنها إثارة النعرات المذهبية أو العنصرية أو الحض على النزاع بين الطوائف و مختلف عناصر الأمة يعاقب عليه بالحبس من سنة إلى ثلاث سنوات و يدفع غرامة مالية من مئة ألف إلى ثمانماية ألف"
فإذاً هيدا العمل يعتبر عمل رسمي
لأنه صادر عن سلطة تنفيذية على الأرض
أي (المجلس البلدي)
و بحسب قانون البلديات و قرار المجلس البلدي
يحق فقط للقائم مقام و المحافظ و وزير الداخلية
التدخل يهيدي القرارات
و شفنا هالشي بتصريح وزيرة الداخلية ريا الحسن
بس طلبت الاستماع لرئيس البلدية للتأكد من حقيقة هيدا الاجراء
و بحال كان صحيح للتراجع عنه لانو غير دستوري
للأسف باتت عملية تملك الشقق و الأراضي
عم تخضع لقيود غير دستورية بحجة
(تمدد الجماعة الطائفية الأخرى )
وهيدا التوجه إنسحب من الحدث لكذا منطقة غير
صاروا غير المسيحيين عم يواجهوا صعوبات
بشراء الوحدات السكنية نتيجة قرارات مخالفة للدستور
طالما ما في ولا سبب بيمنع الشخص بالسكن
بهيدي المنطقة قانونياً
فأنا لازم ما ميز بينو و بين شخص آخر
وبالنهاية اذا بدكن هالبلد يصير فيدرالي
ما تقعدوا بقى تحكونا بالدستور و القوانين