وحياة عيون عيونكن انتو التهيتو بالقشور الصغيرة التافهة ... نسيتو حقوقكن و عيشتكن بهل بلد ... عشتو و ركضتو لتنتخبو ناس و عالم ... بس وصلت نسيتكن بعد اول يوم !
 

كتب الناشط ذو الفقار حركة على حسابه في الفايسبوك منشوراً  يُعبّر عن الوضع المعيشي الضيّق وغلاء الأسعار في لبنان مع صمت وخضوع الشعب اللبناني للأمر الواقع .
وجاء في منشور حركة التالي :
"اشتراك ال ٦ امبير صار ١١٧٠٠٠ يا اهل الله ... البنزين من سنتين كل جمعة ضل يطلع ٣٠٠ ليرة لحد ما صار ب ٣٠ الف ... 
انا شاب و ما عندي بعد عيلة ولا حامل مسؤولية و حاسس حالي مكأب و مش عم لحق ... كيف بقى رب العيلة اللي وراه قسوطة مدارس بدو يسكرها اخر السنة ... ولا شي معتر حدا من اهلو بمستشفى ومضطر يدفع عليهن اللي فوقو واللي تحتو فوق كل هل مصاريف ... هيدا غير الاكل والشرب و نحن هلق بموسم رمضان و كلو نار ب نار ...
والله العظيم ما عاد مشكلة مين بيتجنس ومين لاء ... ولا قصة مين مع مقاومة ومين لاء ... ولا مين ضد تيار الشهيد و مين لاء ... ولا مين عهدو قوي ومين بيلبس قوات ... 
وحياة عيون عيونكن انتو التهيتو بالقشور الصغيرة التافهة ... نسيتو حقوقكن و عيشتكن بهل بلد ... عشتو و ركضتو لتنتخبو ناس و عالم ... بس وصلت نسيتكن بعد اول يوم ... ولك انتخبتو عالم مستحية انها تطالب بأخرا حق الكن الا و هوي انو تكونو مواطنين ... و يكون عندكن وطن ... ما بيكفي سرقو كل شي ... ما ضل عندهن غير رغيف هل خبز و لقمة عيشنا ... شكلو اجا وقتا و بلشو فيها نهب ... روحو الله لا يشبعكن و انشالله بتحطوهن عا صحتكن الف الف ... ايه بس كتر خيركن رح تدفعو ٥ مليون دولار لشركة سما لنحضر المونديال ... واصلين لنهار بعد ... رح ننبسط فيه بالزبالة ... مش لانو تعودنا عليها .... لا بس لانو رح تصير اكلنا و شربنا و مصدرنا لنضل عايشين بهل بلد !
#وطن_التفاهة_انا_هنا"."