هذه شخصيات موجودة في الضاحية وليس المقصود بها التهكم على احد.هو عرض لجزء من الواقع.
1-القفل:
بتسالوا عن شي بخص المقاومة. دغري قبل ما تكمل السؤال بقلك طهر نيعك؟!
2-اليائس المحب للمقاومة:
شبعنا انتصارات بدنا نعيش !
3-الحزبي المتعصب:
السيد القائد بالجمهورية بقول هيك مثل م عم قلك؟!.
4-الحزبي المحتال:
مش المقاومة حررت الجنوب ؟ صح ولا لأ؟ معقولي تقول لأ!
5-الحزبي الطيب :
شو بدك بالسياسة المهم الواحد يرضي ربو و يكون منيح مع العالم .
6-الام الخائفة لابنها: شو بدنا بالاحزاب اوعى تحكي على حدا سترنا برضايي عليك.
7-الحاقد :(يعني اكل قتلة من الحزب او السرايا او الحركة او من حيلا حدا)
يا زلمي مفكرين حالن بطهران شو الن مع ربي بدي اشرب.
8-المنتفع:
خلص ولا يهمك اني بحكيلك مع الحزب منلعبها يا كبير ،عندي ،منتهية.
9-الامني المغرور:
صاحبي مسؤول كبير بالحزب خبرني انو اول الربيع بتكون خالصة بحلب مثل ما عم قلك.
10-المتفائل:
ليك معلم بالحرب الجايي اول شي بيعملو الحزب بفوتوا عل الجليل دغري مش رح ينطروا هل المرة. بيطلعولن من الخنادق بالجليل.
11-الاعلامي المنتفع:
اردوغان طار، هللوا بشار في حلب ،و الحشد الشعبي بالفلوجة . وسنصلي بالجامع الكبير وايران اذا بدن بخمس دقايق بدمروا الخليج .يرد عليه احدهم : و شو بعدن ناطرين!
12- صاحب راس:(مع كاس ويسكي)
ولك لو اني صحيح بشرب بس مع السيد حسن للموت هيدي شي و هيدي شي ثاني.
13-معاصر للحرب الاهلية:
هلق بدك تقنعني انو يلي بالحركة بحبو الحزب ولا ممكن. ليك يمكن يحبو السيد حسن شوي بس الحزب انسى ولا مين مينك. ليش تعول الحزب شو كانوا يقولوا عن الرئيس بري نسينا .معليش!
14-يلي كان يحب الحزب و هلق بحب السيد بس:
يا زلمي ايام الفولفو ستايشن و الاناشيد القديمة كانت احلى مش مثل هلق شيروكي و جي ام سي مفيم و عيشان .كانوا هيك ضعاف و تحسن مؤمنين مش مثل هلق كروش و اكس 6 و ايشارب ب 100$ من عند فولار ابو زينب الله يرحم الشهداء و الله يساعد السيد حسن عليهن.
15-الاستراتيجي:
لو ما الحزب طلعوا يقاتلوا بسوريا كانوا داعش هلق عنا . كانوا حرقوا ديننا . و دبكوا بنيعنا.
16-الاستراتيجي المعترض :
شو بدن بسوريا هلق، يحموا الحدود و خلصنا. عم تدافعولي عنن نسيتوا كيف كانوا داعسينا بالصرماية .ايام عنجر و جامع جامع و رستم عشو عم تدافعو قلي.
17-الاستراتيجي المعاصر للحرب الاهلية:
ولك لما علقوا الايرانيين و السوريين مش كنا عم نشقف بعض بسببن مش الخي كان يقتل خيو و معارك اقليم التفاح و المخيمات مع الحركة و حركة التوحيد بطرابلس و اي نسيت مجزرة فتح الله للسوريين بالحزب. يا زلمي سياسة بسياسة. ما الن رب .
18-الفقير المنعزل:
يا زلمي بدن يظلن يفقرونا لا ما نوعى لانو بس ترتحلك شوي بيعرفوا انك بتتركن و ما عاد بتلكشن. ممنوع بدك تظلك بحاجتن لتجي تنتخب مثل التوتو. وتدقلوا للحاج او المسؤول ليعطيك منحة لابنك او لتفوت امك عالمستشفى. اخ.
19-الفهمان قال:
ليك حبيبي و الله لو ما يدفعلن السيد بعد حرب تموز مصاري و اجارات ووحدات سكنية كان يعطيك العافية ولا حدا بقي مع الحزب. انسى الناس بتحب المصاري يلي
بيدفعلن بيمشوا معو مرحبا مبادئ .بس ايران تقطع الحنفية تخبز بالافراح.؟!
20- شاب بالحركة:
اصلن السيد حسن كان بالحركة مسؤول البقاع و علي عمار و عبدالله قصير ليش عماد مغنية مع مين كان؟! اجت ايران و عرفت كيف تلعبها و سحبتن.
21-المثقف اليساري:
الواحد لازم يقرا .ليك الشيعة كانوا مع الشيوعي ايام الاتحاد السوفياتي و رجعوا قلبوا مع البعث السوري و العراقي ايام صدام حسين و حافظ الاسد رجع اجت حركة فتح قاموا صاروا مع ابو عماروبعدو اجا السيد موسى قلبو حركة ومن بعدها الامام الخميني عملوا حزب .شو بتحكيني واضحة و صريحة كل واحد معو عسكر و مصاري بيمشوا معو .مع القوي ضد اسرائيل مين ما كان.
22-زوزو قبا (موتسيك جوغ مش مسجل بلا واجهة )
ليك طالع عالحدث افقعلي قنينتين بيرة و شيبسي عملح
روق راسي و جاي .بلكي منارغل الليلة عند ابو عساف و منحضركلمة السيد!!.
23-شاب خاطب يريد القتال في سوريا:
بدي اطلع عسوريا بلكي بقبضلي 500$ بالشهر و بامنولي صحة لاهلي و مساعدات وبكرا بستاجر و منتجوز و اذا متت خيي بكون متت شهيد و هيك بيكفلولي مرتي و اهلي و بيعيشوا كيف ما كان احلى من هلق ما في مجال مسكرة بوجي يا زلمي؟!.و اذا بدي سافر ما عندي حدا برا و ما بحب الغربة و مش عيشة هيدي هيك احسن شي؟!
24-المعترض السياسي
يا زلمي ولك يقتلوا للسنيورة و يريحونا منو ما هوي راس الحية .ولك يا زلمي قاموا تحالفوا معن بالحلف الرباعي مع جعجع يا زلمي و رجعوا قعدوا سنة و نص قدام الحكومة وما قدرلوا للسنيورة رجعوا عملوا 7 ايار وعطوهن حجة للسنية يوم مجيد قال .يا زلمي اذا بدك تشتغل سياسة بدك تشيل اللفة بالاول.ابو علي حبيقة كان وزير للطاقة يقعد معن عنفس الطاولة بالحكومة و بتقلي دين وسياسة بتقولوا عنو سفاح بصبرا وشاتيلا و بتقعدوا معو؟!
25-صاحب ال fake account:
قاعد بلا شغل وشغلتو يفتش ع كل واحد عم يحكي بالعاطل عن المقاومة لينشر حريمو او يسبلو وبفتش ع كل واحد مع المقاومة ليطيبلو مع انو ما حدا طلب منو ! هوي قرر يشتغل هالشغلة؟!
26-المرأة الكلاس بتحب الامام الحسين
كل فترة بتعمل مجلس عزاء حسيني وبدل الراحة و البسكوت ,كاتو من عند كريمو مكتوب عليها يا حسين
وتشكلية سواريه و الحضور بمجلس العزا نسوان ازواجهم بيسولون شي 100 مليون دولار . وكلو عامل
ريجيم ما في مين ياكل . ومش بس هيك بتروح عمرة و حاج و زيارة خمس نجوم.وبتبرع بمكيف للحسينية لانو عم تشوب بس تروح.
27-اولاد اغنياء الشيعة:(كيفك برو)
ما بيتكنس من المراقص و البابز بالحمرا و مونو بس بعاشورا و رمضان ما بيشرب و ما بسب و لطميات عصوت عالي بسيارة فيميه .وعالعيد بيفقع سكرة ما الا دين بكارت 300 $ لحدا من بيت الديك.
28-البنت الكول:
صور شبه عارية الها وتاتو يا علي ويقبرني السيد حسن
وع تشليف عل الفايسبوك وبتقلك انا حرة بحالي ما حدا الو معي بس المقاومة خط احمر و بتحب الشهداء كثير . غالبا بتكون مطلقة بس كثير لذيذة.
29-الختيار يلي قاعد عطول بدكانة الحي:(المحروم)
ولك لما اجا السيد موسى كان اتخن شيعي يشتغل عتال عالبور شوف وين صرنا اليوم كلن معلمين و طرقات الجنوب و ما حدا بيرفع راسو بوجنا شو بدك الاستاذ و السيد ببيضو وج الطايفة.
30-بي ام بطة:(العاشق)
بسرعة 20 كيلومتر ماشي عمهلو مفيق نص الحي عصوت هاني شاكر و حمادة هلال او الوسوف لتسمع حبيبتو يلي عل السابع وشاكل قنينة بيرة بين اجريه و السيارة عم تهز من ورا الصوت يلي مركبو وهوي ما سامع شي.و الاحد عبحر صور وبرمضان بيفقع مشوار ليفطر شرعا عم ياخذ بريك شرعي.
31-قبل خطاب السيد و بعدو:(المزاجي)
قبل الخطاب بكون عم ينقر عل الحزب و يعترض فجاة بيطلع السيد و كلمتين حلوين بتلاقي لبيك يا نصرالله و بدنا نحتل الداون تاون و طريق الجديدة و اكبر راس بدو يتكسر.
32-المغضوب عليهم:(المهاجرين)
بكون عم يشتغل بمؤسسة اعلامية او تجارية خصها بالاعداء بيظطر يسكن برات الضاحية بالحمرا او بدارو او فرن الشباك لانو بخاف يرجع بالليل على الضاحية احلا ما يلاقولو شباب الزاوية. و ببلش ينقر عالفايسبوك و قنيية ماي زغيرة و شنطة على ظهرو و لابتوب تفاحة
بقهوة الكوستا بالحمرا. وبصير مع المساكنة و الزواج المدني و الجمعيات وشيعة سفارة و بيطلع تهريب عل الضيعة.؟!
33-النيزكيين:(الهامش و النيزك)
شغل بيت بيت شغل شو بدنا بالسياسة المهم الرواق .بكرا منسافر و انسى هالبلد ما في منو نوى.بدا شي نيزك يقشنا كلنا. وبينبسط كثير بالخبر يلي بنسمعوا كل شهر عن اقتراب نيزك من الارض و بيرجع بخيب املو بس يغير طريقو؟!
34- فاقد الهوية
ساعة مع الحركة ساعة مع الحزب و ساعة بهدد ولك نكاية فيكن بدي صير 14 اذار قولك بيقبلوني وبصدقو انو في شيعي مش مع المقاومة.؟!
- 35 بضل يلي بحب يحلف كثير:
و الامامو علي طبعا للمصداقية وغربة السيد موسى و عيون امي و برحمت كلشن ميتلي و حياة جحيم هالنار (السيجارة) وضلع الزهراء و كف العباس و راس الامام الحسين وعطش الحسين و حياة بنتي الصغيرة وخالي الشهيد و عمي الشهيد وخيي الشهيد بتصدقو بكل هول الا بس يحلف بالله؟!
-36 الحلفنجي الازعر:(مع الاعتذار)
وحياة الله وحياة الله وحياة الله ما بكفي مرة وحدة؟! بعدو طالع من رومية بقلك اختي عتختي اذا عم كذب و بنتي عركابي اذا عم زيد او نقص كلمة .وامي اوكرانية بالمعاملتين اذا عم زل بحرف ؟!
-37- شخصية اذا بشوفو بدي فجمو؟!
شخصية بتخلق بس حدا يكتب شي عالفيسبوك شي مش عاجبو و ينتظر محاسن الصدف ليشوفو وجها لوجه ليدبك بنيعه؟!و يفجمو او يشقفوا او يربيه ؟! و اوقات بصير صاحبو اذا عرفوا عليه حدا؟!
هذه عينة من الشخصيات في الضاحية الجنوبية و نسبتهم في المجتمع تحدد الوعي السياسي و امكانية التغيير للافضل او يبقى الوضع على ما هو عليه.
(عيسى صليبي عن الفيسبوك).