أصعب شي احكي عن "الجيش اللبناني"  لهيك اسمحولي اطلع من لغتي ومن البلاغة و"احكي " بلبنانيتي وبعفويتي ...

نحن هالسنة بعيد الجيش مقسومين مش 8 و14 ولا طائفياً ولا حزبياً ، ولكن بالمشاعر ...

مقسومين لأن ، قسم من جواتنا بدو يركع ويبوس تراب العسكر ويحييه ألف مرة بعيده ...

وكيف لا ؟

ما العسكر هن الوطن ، مش نحن بس نشوف الجيشي الي لابس البدلة منقله "يا وطن"

العسكر هن نحن ، هن الي حميونا هن الي منعوا الفتنة مرة وتنين وألف ..

هن الي بغيبوا عن بيوتهن وعن ولادهم وبيحموا حدودنا وبيرجعوا شهدا ...

 

العسكر ... هن الي ما قدروا سياسيين لبنان يفرقونهن ، و الي ياما اكلوها "عالملتين" ، وضلهن صامدين وشامخين ...

العسكر،الي اتهموه الخونة بأنه "عسكر متعصب" والأيام كشفت انهن هن المتعصبين وانو جيش الوطن فوق الكل ...

بعيد العسكر قسم  مني بدو يصلي لهالجيش وبدو يشعل شمعة بكنيسة وبدو يبوس ايد كل مين واقف عالحدود من اصغر جندي لأكبر عميد ...

 

بعيد العسكر

بقول للسياسيين انضبوا وشيلوا صوركن الي بتدعوا فيها الدعم "وحلوا عن سما عسكرنا" ...

 

أما القسم التاني مني القسم التاني جواتي ، فبدو يبكي يوقف مع اهالي المخطوفين وبدو يقول من دون العسكر ما يرجع النا ما في عيد ..

القسم التاني بدو يقعد مع عيلة "المقدم كحيل" وبدو يحط وردة عقبره ويقله يا ريتك كنت بهالعيد ؟!

القسم التاني بدو يروح عقبور الشهدا الي سقطوا كرمال الوطن ويقلهن ... ينعاد عليكم "انتو الوطن "