بحر بْواب
يا ناطر النسيان... يا مدبوح
الحبّ بْيِجي وبيدقّ باب الروح
وبيلبّسَك عا وصلتو تيابو
النسيان؟ هوِّي بينطرك تا تروح
تفتّش بـ بحر بواب... عا بابو
* * *
تراب ما بيموت
مرَّه بـ زمانو شاف حفّار القبور
في عتم جوَّا مقبَرَه بيشِعّ نور
والمقبرَه صَرْلا سنين مسكَّرَه
سْكوتا قصر عا قدّ رجّال ومرا
وبالكاد شقّ الباب
شَدّو ملاك الحبّ بيـ كتفو لْوَرا
وعِلْقو بـ عينو كمشتين تراب
عم يغمرو بعضن بـ عتم المقبره.
* * *
خْيال... لَ الشّمس
هالشمس عم بتقول: "يخزي العين"
بْلا خيال ما شافِتْ حدا ماشي
لا غيْم... لا عصفور... لا فراشِه
ومش عارفِه الخيال جايه مْنَيْن
مش عارفِه أُوعا حدا يقِلاّ
مش ناقِصا قهر ولا شغلِة بال
مين اللّي بدّو خيال يرسِملا؟!
طالِع عا بالا خْيال
* * *
بيّاع الجرايد
(لَ فيفيان صليبا داغر)
واقِف بـ عَيْن الشّمس... صبحيّات
اللّقمِه بـ جريدِه... فاضِتْ خْبارا
قبل الإيديْن تفلفِشا النّسمات
وريحِة صَبيعو فقْر... والنهدات
تشقَع بـ وجّو عتم المغارَه
واقِف بـ عَيْن الشّمس... صبحيّات
ما شافْتو هونيك سيّارَه
والناس عم تركض ورا نهارا
نَفضِتْ عن عيونا هاك الدّمّات
خْيالو بِكي... خْيالو وِقِف لَمّو
ما أوجَعَك يا دمع الخيالات
وما في جريدِه كتبِت بـ دمّو
أربع خمس كلمات:
"مات بيّاع الجرايد... مات"